"അല്ലാഹുവിന്‍റെ റസൂൽ ﷺ ഉംറ നിർവ്വഹിക്കാനായി പുറപ്പെട്ടു. റസൂൽ ﷺ യോടൊപ്പം സ്വഹാബികളും പുറപ്പെട്ടു. അവരിൽ ഒരു വിഭാഗത്തെ (അബൂ ഖതാദ ﵁ ഉൾപ്പെടെയുള്ളവരെ) നബി ﷺ മറ്റൊരു വഴിക്ക് നിയോഗിച്ചു കൊണ്ട് പറഞ്ഞു: 'നമ്മൾ കണ്ടുമുട്ടുന്നത് വരെ നിങ്ങൾ കടൽതീരം വഴിയുള്ള പാത സ്വീകരിക്കുക'. അവർ ആ വഴിക്ക് നീങ്ങി. യാത്രക്കിടയിൽ അബൂ ഖതാദ ﵁ ഒഴികെ ബാക്കിയുള്ളവരെല്ലാം ഇഹ്‌റാമിൽ പ്രവേശിച്ചു (അബൂ ഖതാദ ﵁ ഇഹ്‌റാമിലായിരുന്നില്ല).

അവർ സഞ്ചരിച്ചുകൊണ്ടിരിക്കെ കുറച്ച് കാട്ടുകഴുതകളെ കണ്ടു. ഉടനെ അബൂ ഖതാദ ﵁ അവയെ വേട്ടയാടുകയും അതിലൊരു പെൺ കഴുതയെ പിടിക്കുകയും ചെയ്തു. ഞങ്ങൾ ഇറങ്ങി അതിന്‍റെ മാംസം ഭക്ഷിച്ചു. എന്നാൽ പിന്നീട് ഞങ്ങൾ ചിന്തിച്ചു: 'നമ്മൾ ഇഹ്‌റാമിലിരിക്കെ വേട്ടയാടിയ മാംസം കഴിക്കാമോ?'. ശേഷം ബാക്കിയുള്ള മാംസവും എടുത്തുകൊണ്ട് ഞങ്ങൾ റസൂൽ ﷺ യുടെ അടുത്തെത്തി വിവരം ചോദിച്ചു.

അപ്പോൾ നബി ﷺ ചോദിച്ചു: 'നിങ്ങളിൽ ആരെങ്കിലും അത് വേട്ടയാടാൻ അദ്ദേഹത്തോട് കൽപ്പിക്കുകയോ അല്ലെങ്കിൽ അതിലേക്ക് ആംഗ്യം കാണിച്ചു കൊടുക്കുകയോ ചെയ്തിട്ടുണ്ടോ?'. 'ഇല്ല' എന്ന് അവർ മറുപടി നൽകി. അപ്പോൾ നബി ﷺ പറഞ്ഞു: 'എങ്കിൽ ബാക്കിയുള്ള മാംസം കൂടി നിങ്ങൾ ഭക്ഷിച്ചുകൊള്ളുക'."

മറ്റൊരു റിപ്പോർട്ടിൽ ഇപ്രകാരം കൂടിയുണ്ട്: "നിങ്ങളുടെ കൈവശം അതിൽ നിന്ന് വല്ലതും ബാക്കിയുണ്ടോ?" എന്ന് നബി ﷺ ചോദിച്ചു. 'ഉണ്ട്' എന്ന് പറഞ്ഞ് ഞാൻ അതിന്‍റെ ഒരു മുൻകാൽ (മുകൾഭാഗം) നബി ﷺ ന് നൽകി. നബി ﷺ അത് ഭക്ഷിക്കുകയും ചെയ്തു.